9 أفكار للقراءة السريعة مع التركيز

كتير مننا ممكن يكون وهو بيقرأ كتاب يلاقي فكرة أو مجموعة أفكار تغير حياته.. الأفكار دي ممكن تكون خليته يكسب فلوس أكتر أو أن علاقاته تبقىى أحسن أو صحته تتحسن. تخيل بقى بدل ما تقرأ كتاب واحد في الشهر تقرأ أربعة أو أكتر.. شوف كمية الأفكار الجديدة اللي هتعرفها وتفيدك لو اتعلمت القراءة السريعة.
ممكن يكون عندك اعتقاد أن صعب تزود سرعة قرائتك.. لكن في الحقيقة أي حد ممكن يزود سرعة قرائته بشكل ملحوظ عن طريق الممارسة والتدريب وده هيتحقق بأفكار بسيطة للقراءة السريعة زي:

متحركش شفايفك وانت بتقرأ ،

كتير مننا متعود أنه أثناء القراءة بيحرك شفايفه ويهمس باللي بيقرأه.. ده بيخليه متخيل أنه بيسمع الكلمة وهو بيقرأها في العقل اللاوعي. نتيجة كده أنك هتقرأ بنفس سرعة الكلام اللي هي سرعة بطيئة.

الحل أنك تدرب نفسك أنك تبص للكلام وتفهمه من غير ما تحرك شفايفك أو تتخيل نفسك بتقرأه بصوت عالي، مع الوقت هتلاحظ أن العادة دي اختفت وأن سرعتك اتحسنت.

حدد سرعة قرائتك،

مهم أنك تكون عارف سرعة قرائتك دلوقتي وتقيسها من وقت للتاني علشان تحس بانجاز كل ما تتقدم فبالتالي السرعة تزيد أكتر، الشخص العادي بياخد حوالي 5 دقائق في الصفحة الواحدة لكن مع التدريب ممكن توصل لدقيقتين بس فهتقرأ الكتاب مرتين ونص أسرع.

استخدم قلم تشارو بيه،

استخادمك لقلم أو حاجة تشاور بيها، ده هيمنع العين أنها تعيد قراءة الكلمات وهيخليها تمشي في اتجاه واحد بس فبالتالي السرعة هتزيد.

اتخطى المعلومات اللي مش محتاجها،

اتدرب على تخطى المعلومات اللي ملهاش لازمة بالنسبة ليك، يعني ممكن تكون بتقرأ كتاب تاريخي وهدفك أنك تعرف تاريخ حدث معين فبدل ما تقرأ الكتاب كله علشان تعرف الحدث ده فممكن تعدي بعينك بسرعة على الكلام لحد ما توصل للحاجة اللي عيزها بس.

ركز على حركات عينيك أثناء القراءة،

اتدرب أن عينيك تتحرك بشكل منفصل عن رأسك وانت بتقرأ، ده هيساعد على زيادة السرعة بشكل ملحوظ.

مش لازم تقرأ كل كلمة،

فيه كلمات وحروف مش بتأثر على المعنى زي حروف الجر مثلاً فلما تتدرب أنك متقرأش الكلمات دي هتلاحظ سرعة قرائتك زادت بشكل كبير.

استخدم تطبيقات الموبايل،

فيه تطبيقات كتير  بتتدربك على سرعة القاءة زي: Readsy , Spreeder ,Outread

اتدرب أكتر،

استغل وقت فراغك في المواصلات أو الانتظار في انك تقرأ اي حاجة ولو بوست طويل على فيس بوك.. ده هيخليك تتدرب أكتر على القراءة فبالتالي سرعتك هتزيد مع الوقت.

اقرأ الخلاصة،

غالباً المعلومات المهمة بتبقى في بدايات ونهايات الفقرات.. فاتدرب على أنك تقرأ أول واخر الفقرات ولو فيه حاجة مش مفهومة ساعتها بس ممكن تقرأ الكلام اللي في النص. 

أهم حاجة أنك تتدرب على الأفكار دي مهما تحس أنها صعبة في الاول لكن مع التدريب هتحس بسهولتها وهتلاقي أن سرعتك زادت بشكل ملحوظ. 

المصدر: Amr Elazab

error: لا يمكن نسخ النص