في حوار تليفزيوني نادر أجراه الإعلامي مفيد فوزي، مع الفنان عمرو دياب. ويعد من أشهر الحوارات التي يتداولها رواد السوشيال ميديا. بسبب استفزاز مفيد فوزي للهضبة، وخروجه عن شعوره.. حين سأله عن سعر أول سيارة اشتراها النجم.. ليرد بعصبة: ركبت عربية بعد 5 سنوات غناء وبدفع أقساطها.
كما تناول اللقاء محاولات عديدة من مفيد فوزري لإستفزاز الهضبة عمرو دياب، ليخرج عن شعورة ويجيب عن أسئلته بصراحة. وهو نوع من أنواع التشتيت للضيف يستخدمة مفيد فوزي في حوارته.
أيضا تم توجيه اتهامات بعدم احترام الجيل القديم.. حين ذكر مفيد فوزي الفنان محمد عبدالوهاب قال أن معظم أغاني الجيل الحالي لا تصلح إلا في الأندية الليلية.
حوار عمرو دياب
س/ أستاذ عمرو ليه الأستاذ عبدالوهاب قال أن معظم أغانيكم لا تصلح إلا في الأندية الليلية ؟!
= وجهة نظر.
س/ يعني ايه وجهة نظر ؟! وبتقولها ليه كده وانت بتشوح بإيدك ؟! يعني ايه وجهة نظر ؟!
= ما هو أنا هتكلم بقى بصراحة لأن أنا أعصابي خلاص ، كل واحد فينا له أعصاب ولها حد احتمال.
س/ عظيم ، قال الأستاذ محمد عبدالوهاب أن أغاني الشباب الجدد تصلح للغناء في الأندية الليلية، يكاد الواحد يسمعهم وهو بياكل أو يتعشى حاجات كده جنب الأكل بس ده اخرهمّ
= برضو وجهة نظر .. أنا طالما مأدي رسالتي صح زي ما أنا مرتاح لها وزي ما أنا شايف الشريط اللي أنا تعبت فيه وعملته طلع 7 شهور رقم واحد.. ولما جات أغنية الموسيقار عبدالوهاب كانت رقم 2 في أغنية “من غير ليه” ولحد دلوقتي أنا نمرة واحد ودي ملهاش علاقة بأي شيء غير انها مبيعات كاسيت، بس ما دام أنا ناجح في الكاسيت وما دام ربنا كارمني في حاجات كتيرة جدا جدا يبقى دليل على …
– طيب طيب الأستاذ عبدالوهاب بيقول أن الجمهور مات وشيعت جنازته
= طب ما هو لو كده مكنش سمع “من غير ليه” بتاعة الأستاذ عبدالوهاب ما هي نجحت.. طب نجحت إزاي والجمهور مات؟! يعني هو الجمهور مات وصحيلها ؟!
– لأ بس أيقظته “من غير ليه”
= أيقظته ؟!! ماشي
س/ هل الجمهور ذوقه حصل فيه خلل ؟ هل حدث خلل في الذوق بتاع الناس ؟!
= والله العظيم بتظلموا الناس يعني لما بروح حفلة بيجيلي فيها 30 ألف واحد ، فيه مطرب بيجيله 30 ألف غيري ؟! بييجوا ليه ؟! عشان الناس ماتت ؟! هذا الجمهور مات ؟! 30 ألف واحد ماتوا ؟! ولا جم كده صدقة ؟! أهاليهم ادوهم فلوس وقالولهم والنبي روحوا اتصدقوا على عمرو دياب واسمعوه !!