طرح الشاعر عمرو حسن قصيدة جديدة، اليوم الإثنين عبر حسابة الرسمي على موقع التواصل الاجتماعي فيسبوك، بعنوان “ياصاحبي”.
وكان عمرو حسن قد شارك جمهور قبل قليل، فيديو قصيدته الجديدة، على فيسبوك قائلا: “سنة حلوة جايه عليك ياصاحبي يا أحلى حاجة في السنة”.
اقرأ أيضاً: في نهاية العام.. عمرو حسن يوجه رسالة للإكس
وأضاف الدرويش في تعليق على القصيدة الجديدة قائلاً: “اعمل منشن لأعز ناس عندك.. واللي طلعت بيهم من سنة ٢٠٢٢”
قصيدة عمرو حسن
ياصاحبي طلعت بيك من السنة
انت اللي لما بكون معاك بكون انا
عارف حقيقتي
حافظ طباعي
فاهم حدود شخصيتي دايما مراعي
عمرك ماخنت العهد بينا ولا افتريت
وبشوف في عز الحزن قلبك ليا بيت
بينك وبيني سر عمره ما اتحكى
ومعايا في الحالتي سوا
فرح وبكا
تعرف ساعات بحس انك دعوتي
ساعة ما قولت يارب قرب نحيتي
صاحب سند ميخونش سري ولقمتي
ويكون سلاحي الحي وقت المدعكة
انت اللي طالع بيك ويكفي انك معايا
عارف حكاية أخوك وشاهد من البداية
ببصلك وأكني شايف نفسي قدام المرايا
الأهل مش بيت انت فيه
الأهل شخص طلعت بيه
لما السنين تضغط عليك تلاقيه وتد
وقف معاك وقت البنا ووقت الهدد
في الحزن كروان غنوتك
في الحرب يتحول أسد
وتلاقي نفسك وقت شده لجأت ليه
يحصل مابينكم مهما يحصل تفضلوا
أخين لا حصلوا في يوم
ولا يحصلوا
وتغيب ومهما يطول غياب
لا في بينكم لوم ولا في عتاب
روح واحده على جسمين صحاب
لو حتى للنار توصلوا
انت اللي باقي ياصاحبي ولآخر حياتي
شريك أساسي في كل حاجة في ذكرياتي
لو غيبت عنك يسألوك طب فين أخوك؟
واذا غيبت عني يقولوا نصه التاني ضل
محل ايه من غير وجود صاحب المحل!
الساعة تمشي ازاي بدون ايد الساعاتي
انت اللي باقي في كل حاجة في ذكرياتي
طلعت بيك من وسط عالم غداراين
تايهين في ليه وازاي وامتى وفين ومين
اخصام وخونه ونصابين
وانت الأمين من غير صفار ولا نفسنة
انت انا
سنه حلوه جاية عليك ياصاحبي
يا احلى حاجة في السنة