وجهت الكاتبة جهاد الديناري عبر صفحتها الشخصية على موقع التواصل الاجتماعي فيس بوك رسالة لنقاد مسلسل جعفر العمدة، الذي يخوض به الفنان محمد رمضان السباق الرمضاني 2023.
مسلسل جعفر العمدة
حيث شاركت متابعيها منشور طويل قالت فيه: “رسالة للنقاد إللي بيهاجموا جعفر العمدة.. من باب إن لازم نهاجم محمد رمضان علشان نبقي ناس أكاديميين ومينفعش ندافع عن عمل شعبي مش مركب وماشي علي بناء وخط بسيط علشان نبان متخصصين.. وكده أحب أقولكوا إننا معجونين بالمهنة ودارسين نقد زيكوا وأكتر”.
وأضافت: ” عارفين إن زي ما الدراما المركبة اللي بترصد حالة تاريخية أو قضية جدلية مهمة.. فالقصص الاجتماعية البسيطة اللي بتنقل حياة فئة ثقافية معينة زي الأحياء الشعبية والأحداث اللي بتدور فيها والقصص البطولية من وجهة نظر سكانها كمان مهمة جدا جدا”.
وأوضحت: “رسم شخصية البطل الشعبي اللي بياخد حقه بدراعه.. بتختلف تماما عن البطل القومي والبطل السياسي والمثقف.. وكل بطل بتختلف أبعاده من مجتمع لأخر”.
وتابعت: “وعلي فكرة البطل الشعبي هو البطل اللي اعتمد عليه تراثنا هو البطل الأساسي في الحكاية الشعبية والتراثية وهو النوع الأقرب للمتلقي اللي بيشوف نفسه فيه.. فمنجيش دلوقت نبص لجعفر العمدة نظرة تعالي ونتفرج عليه بالليل عادي وبالنهار نهاجمه أو نتجاهله.. علشان نبقي نقاد دارسين وفاهمين وإنتوا في الأساس بتعانوا من الازدواجية.. وبتقولوا أفكار عكس قناعتكم من باب الاختلاف وفقط”.
قصة مسلسل جعفر العمدة
وأشارت جهاد الديناري: “جعفر العمدة مسلسل سهل ممتنع مقدم قصة تصاعدية سريعة الأحداث جذابة.. وبالنسبة للأخلاقيات فهي مطروحة من خلال البطل اللي بيمثل الحق والخير والقوة.. وياريت مننساش إن من أهم رسايل الفن المتعة وده متحقق في المسلسل دون إخلال بسياقات الدين والأخلاق. فمفيش داعي ننظر علي المسلسل وننقده بما ليس فيه”.
وأضافت: “نقطة أخيرة بالنسبة للخناقات اللي بتتضمنها أحداث المسلسل واتهامات البعض إنها مش واقعية ومبالغة.. أحب أقولكوا من واحدة عاشت في السيدة زينب فترة طويلة واما بتكلم عن السيدة زينب مش بتكلم عن الميدان وشارع بورسعيد والمبتديان حضرتك.. لأ بتكلم عن المدبح وأرض يعقوب و أرض الجوزيل وغيرها من مناطق الحي.. اللي شافت خناقات أصعب وأقوى بكتير من المتقدمة في المسلسل”.
وتابعت: “كمان فكرة العائلات والمنافسات والاتحادات بين العائلات أو الخلافات بينهم موجودة.. وبالنسبة لجعفر العمدة رجل الأعمال الشعبي والعائلة اللي بتشتغل كلها مهنة واحدة فهي برضو موجودة”.
ابطال مسلسل جعفر العمدة
ونوهت جهاد الديناري: “قبل ما تنتقدوا روحوا شوفوا عائلات كبيرة جدا في السيدة زينب زي ( النواوى.. الفلاح.. الطرابيشي.. السنان.. عاشور) وغيرهم من العائلات اللي موجودة في الواقع بنفس قوة الدراما يا متعلمين يا بتوع المدارس”.
وذكرت: “لو هنتكلم بالعلم والدراسة يبقي قبل ما تكونوا رأيكوا وتطلقوا أحكام علي المسلسل تتهموه بأنه بيقدم صورة مشوهة للمجتمع الشعبي وإن بينشر صفات غير أخلاقية.. اتعبوا نفسكوا وأعملوا دراسة سريعة وفقا لمنهج استجابة المتلقي إللي درستوه، وشوفوا تأثير المسلسل في الشارع المصري هل أثر سلبي أو إيجابي؟.. أو حتى تابعوا بعض التقارير اللي مواقع عملتها ونزلوا سألوا الناس في حي زي سيدة زينب عن رأيهم في شخصيات العمل الفني.. و اللي كانت اجابتهم كلها منحصرة في صفات الجدعنة والقوة المتمثلة في جعفر والإخلاص في شخصية نعيم ونبذ الخيانة والغدر المتمثل في عائلة فتح الله”.
وأضافت: “يعني الناس وصلتهم رسايل أخلاقية بعيدة عن العنف والانحراف الأخلاقي اللي بيدعيه البعض.. الحقيقة إن العمل البسيط ده أثر علي المشاهد ووصل رسايل ممكن أعمال عميقة ومركبة كتير متعرفش توصل نصها”.
واختتمت: “يكفي أنه جمع الأسرة المصرية في مشهد مشوفنهوش من أيام ليالي الحلمية”.